ಕರ್ತವ್ಯದ ನಡುವೆಯೇ ಬಿಎಲ್ಒ ಹೃದಯಾಘಾತಕ್ಕೆ ಬಲಿ: ಗದಗ ಜಿಲ್ಲೆಯಲ್ಲಿ ದುರಂತ

ಹುಬ್ಬಳ್ಳಿ, ಜು.15: ಬೆಂಬಲ ಬೆಲೆ ಯೋಜನೆಯಡಿ ಸರ್ಕಾರಕ್ಕೆ ಹೆಸರು (ಹೆಸರುಕಾಳು) ಮಾರಾಟ ಮಾಡಿ ಏಳು ತಿಂಗಳು ಕಳೆದರೂ ಹಣ ಪಾವತಿಯಾಗದ ಹಿನ್ನೆಲೆಯಲ್ಲಿ ರೈತರು ಮಂಗಳವಾರದಿಂದ ಉಗ್ರ ಪ್ರತಿಭಟನೆ ಆರಂಭಿಸಿದ್ದಾರೆ.

ರೈತ ಸೇನಾ ಕರ್ನಾಟಕ ಸಂಘಟನೆಯ ನೇತೃತ್ವದಲ್ಲಿ ಬ್ಯಾಹಟ್ಟಿ, ಸುಳ್ಳ, ಕಿರೇಸೂರ ಹಾಗೂ ಅಮರಗೊಳ ಭಾಗದ ರೈತರು ವಿಕಾಸನಗರದಲ್ಲಿರುವ ರಾಜ್ಯ ಸಹಕಾರ ಮಾರಾಟ ಮಹಾಮಂಡಳದ ಕಚೇರಿ ಎದುರು ಧರಣಿ ನಡೆಸಿ ಸರ್ಕಾರದ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದರು.

ರೈತರ ಆರೋಪದಂತೆ, 2024–25ನೇ ಸಾಲಿನಲ್ಲಿ ಬ್ಯಾಹಟ್ಟಿ ಹಾಗೂ ಟಿಎಪಿಎಂಎಸ್ ಅಮರಗೊಳ ಸಹಕಾರ ಸಂಘಗಳು 95 ರೈತರಿಂದ ಹೆಸರು ಖರೀದಿ ಮಾಡಿದ್ದು, ಸುಮಾರು ₹87 ಲಕ್ಷ ಹಣ ಇನ್ನೂ ರೈತರಿಗೆ ಪಾವತಿಯಾಗಿಲ್ಲ.

ಹೆಸರು ಖರೀದಿಸಿದ ಬಳಿಕ ಸರಕಿನ ಪರಿಶೀಲನೆ, ಬಾರ್‌ಕೋಡ್ ನೋಂದಣಿ ಸೇರಿದಂತೆ ಎಲ್ಲ ಪ್ರಕ್ರಿಯೆ ಪೂರ್ಣಗೊಳಿಸಿ ನವಲಗುಂದದ ಸರ್ಕಾರಿ ಗೋದಾಮಿಗೆ ಕಳುಹಿಸಲಾಗಿತ್ತು. ಆದರೆ ಸುಮಾರು ಒಂದು ತಿಂಗಳ ಬಳಿಕ "ಗುಣಮಟ್ಟ ಸರಿಯಿಲ್ಲ" ಎಂಬ ಕಾರಣ ನೀಡಿ 1,600 ಚೀಲಗಳನ್ನು ವಾಪಸ್ ಕಳುಹಿಸಿರುವುದು ರೈತರ ಆಕ್ರೋಶಕ್ಕೆ ಕಾರಣವಾಗಿದೆ.

ಈ ಕುರಿತು ರೈತ ಮುಖಂಡ ವೀರೇಶ ಸೊಬರದಮಠ ಮಾತನಾಡಿ, "ಸರಕು ಸ್ವೀಕರಿಸಿ ಒಂದು ತಿಂಗಳ ನಂತರ ಗುಣಮಟ್ಟದ ನೆಪ ಹೇಳುವುದು ಯಾವ ನ್ಯಾಯ? ರೈತರಿಗೆ ಅನ್ಯಾಯವಾಗಿದ್ದು, ಕೂಡಲೇ ಬಾಕಿ ಹಣ ಬಿಡುಗಡೆ ಮಾಡಬೇಕು" ಎಂದು ಆಗ್ರಹಿಸಿದರು.

ಇದಕ್ಕೆ ಪ್ರತಿಕ್ರಿಯಿಸಿದ ರಾಜ್ಯ ಸಹಕಾರ ಮಾರಾಟ ಮಹಾಮಂಡಳದ ವಿಭಾಗೀಯ ವ್ಯವಸ್ಥಾಪಕ ಮಲ್ಲಿಕಾರ್ಜುನ ಮಲ್ಲನ್ನವರ, "ಸಹಕಾರ ಸಂಘಗಳು ಸರಿಯಾದ ಗುಣಮಟ್ಟ ಪರೀಕ್ಷೆ ನಡೆಸದೆ ಹೆಸರು ಖರೀದಿಸಿರುವುದರಿಂದ ಈ ಸಮಸ್ಯೆ ಉಂಟಾಗಿದೆ. ಸರ್ಕಾರಕ್ಕೆ ವರದಿ ಸಲ್ಲಿಸಲಾಗಿದ್ದು, ಮುಂದಿನ ಸೂಚನೆಯಂತೆ ಕ್ರಮ ಕೈಗೊಳ್ಳಲಾಗುವುದು" ಎಂದು ತಿಳಿಸಿದ್ದಾರೆ.

ಈ ನಡುವೆ ತಹಶೀಲ್ದಾರ್ ಜಿಲ್ಲಾಧಿಕಾರಿಗಳ ನೇತೃತ್ವದಲ್ಲಿ ಸಭೆ ನಡೆಸಿ ಸಮಸ್ಯೆ ಬಗೆಹರಿಸುವ ಭರವಸೆ ನೀಡಿದ್ದರೂ, ರೈತರ ಬ್ಯಾಂಕ್ ಖಾತೆಗೆ ಬಾಕಿ ಹಣ ಜಮಾ ಆಗುವವರೆಗೂ ಪ್ರತಿಭಟನೆ ಹಿಂಪಡೆಯುವುದಿಲ್ಲ ಎಂದು ರೈತರು ಸ್ಪಷ್ಟಪಡಿಸಿದ್ದು, ಧರಣಿ ಮುಂದುವರಿದಿದೆ.